May natumod na ang awtoridad nga partikular nga area sa Taal Lake kun sa diin umpisahan ang pagpangita sang mga missing nga mga manugbulang nga gin-alegar ginpangpatay kag ginpangtagbong didto sang 2021 kag 2022.
“Merong fishpond lease ang isang suspect na ano natin, tinutukoy natin. Bali ‘yun ang ating ano… ground zero natin,” suno kay Justice Secretary Boying Remulla.
Pahayag sang tiglikom, subong na nga semana umpisahan ang pagpangita sa mga bangkay.
Ang natalana nga operasyon ang nag-ugat sa alegasyon sang isa ka whistleblower nga si Julie “Dondon” Patidongan nga ginpapatay ang mga biktima sa adlaw mismo nga gin-kidnap sila, ginhigot ang lawas sa mga sako, antes sila ginpangtagbong sa lake.
Matandaan nga nag-request man ang Pilipinas sang technical assistance sa Japan apang wala pa sang sabat sa hingyo sang gobyerno.
Nagtanyag naman ang Department of Science and Technology (DOST) nga gamiton ang ila nga expertise and equipment sa search, ilabi na bangud positibo suno sa tiglikom nga didto pa ang mga tul-an kun matuod nga didto gid man ang mga bangkay ginhaboy.
Handa man ang National Bureau of Investigation (NBI) nga maghatag sang ila nga forensic expertise.
Una na nga gintudlo sang whistleblower ang negosyante nga si Charlie “Atong” Ang nga amo ang mastermind sa krimen, kag gin-tag man si Gretchen Barretto nga may ihibalo. Pareho nga nagpanginwala ang duha sa nasambit nga akusasyon.#
