Gina-imbestigaran na sang Korte Suprema ang ang isa ka anay hukom nga ginaalegar nga na-involve sa kaso sang missing nga mga manugbulang.
Ginkumpirma ini ni Justice Secretary Jesus Crispin Remulla matapos ang ginbulgar sang whistleblower nga si Julie “Dondon” Patidongan nga ini nga former judge ang naga-facilitate sang mga kaso para sa businessman nga si Charlie “Atong” Ang nga amo ang ginatudlo nga mastermind sa pagkadula kag pagpatay sa mga biktima.
Suno kay Remulla, naka-istorya na siya kay Chief Justice Alexander Gesmundo kahapon sang aga kag ila na-diskusyunan ang amo nga alegasyon. Lain-lain man ang gina-usisa suno kay Remulla sang ginpamangkot siya kun pila gid ka mga hukom ang involved.
Matandaan nga una na nagpaandam ang Justice Secretary nga tuman ka manggaranon nga tawo ang involved sa kaso nga ini kag madamo man ini sang koneksyon nga sarang makalusot pati sa mga korte sang Pilipinas.
Una na nagpanginwala si Atong sa iya involvement sa kaso. Si Gretchen Barretto, nga gin-tag man ni Patidongan nga may ihibalo sa krimen, ang nagpaguwa naman sang statement nga nagaklaro nga wala siya sang kahilabtanan diri.
Napaidalom naman sa proteksyon sang Philippine National Police (PNP) ang whistleblower bangud sa mga impormasyon nga ginsugid sini sa mga otoridad. Napasa naman sang PNP sa DOJ ang iya sworn affidavit kag ang supporting documents lakip na ang petty cash vouchers bilang kabahin sang preliminary investigation.
