Mapauli na sa Pilipinas subong nga adlaw, Agusto 9, ang nabilin nga delegasyon sang pungsod nga nagpasakop sa Tokyo 2020 Olympics.
Sa exclusive interview sang Bombo Radyo kay Mariano ‘Nonong’ Araneta, Jr., chef de mission sang Philippine delegation sa Olympics, iya ginpahayag nga halos isa ka bulan man sila nga nagtinir sa Japan bangud sa ginpasakupan nga mga hampang.
Restricted ang hulag sang mga atleta pati sang mga officials sa Olympic village, apang nabayluhan naman ini sang isa ka historic gold, duha ka silver, kag isa ka bronze nga medalya.
Ang Pilipinas ang nagpanguna sa mga pungsod sa Southeast Asia nga may best performance sa Olimpyada subong nga tuig.
Ang 19 ka mga atleta sang Pilipinas ang ginalakipan nanday boxers Irish Magno, Nesthy Petecio, Eumir Marcial, Carlo Paalam, weightlifters Elreen Ando kag Hidilyn Diaz, pole vaulter EJ Obiena, rower Cris Nievarez, gymnast Carlos Yulo, taekwondo jin Kurt Barbosa, skateboarder Margielyn Didal, rifle shooter Jayson Valdez, sprinter Kristina Knott, judoka Kiyomi Watanabe, golfers nga sanday Juvic Pagunsan, Bianca Pagdanganan, Yuka Saso, kag swimmers nga sanday Remedy Rule kag Luke Gebbie.
Iban sa sini nga mga atleta ang nakauna na pauli sa Pilipinas.
Sa 19 sa ila, si Diaz lang ang four-time Olympian; ang 18 sa ila ang lunsay first-timer sa Olympics.
