Igapaidalom pa sa evaluation ang iban pa nga mga units sang Metro Iloilo Transport Services (MITSCOOP) antes makabaton sang ayuda halin sa gobyerno.
Sa interview sang Bombo Radyo kay Cherry Acebuque, chairwoman sang MITSCOOP, iya ginpahayag nga kun wala pa napa-register ang units ila anay nga tapuson ang tanan nga mga requirements agud nga makabaton ini sang 20K subsidiya.
Nahibaluan nga may ara pa sang 18 ka mga units nga under maintenance ang MITSCOOP kag yara pa sa motor poll area.
Suno pa kay Acebuque, iya ginpadulungan ang Land Transportation Franchising and Regulatory Board kag ginpasiguro man sang mga ini nga willing sila nga magbulig agud makabaton ang MITSCOOP sang subsidiya sang gobyerno.
Gindugang pa sini nga kinahanglan pa nila ma-comply ang certificate for good standing sang OTC agud dalayon nga makabaton ang iban nila nga units.
