Padayon ang koordinasyon sang Metro Iloilo Water District ukon MIWD kag Metro Pacific Iloilo Water ukon MPIW sa Iloilo City Government agud masiguro nga masupplyan sang nagakaigo nga tubig ang syudad ilabi na sa tion sang El Niño.
Sa interview sang Bombo Radyo kay Joy Fantilaga-Gorzal, Spokesperson ni Mayor Raisa Treñas, iya ginpahayag nga nakapatigayon sang meeting ang MIWD kag MPIW Board kahapon nga adlaw agud i-presentar ang Water Infrastructure and Supply Update lakip ang census-based planning, ongoing kag pending projects kag expansion plans para sa 2027.
Suno kay Gorzal, ginpangabay man sa meeting nga i-update ang census data ilabi na sa mga bag-o nga building developments bangud madamo na subong sang investors sa syudad sang Iloilo.
May plano man nga magbutang sang static storage tanks sa mga barangay nga gin-identify nga nagaeksperyensya sang tuman nga problema sa tubig.
Dugang pa diri, ang sister company nga Flo Water ang magaprovide man sang dugang nga supply sang tubig kag may pila ka private companies nga nag-commit man nga magdugang sang supply sa mga barangay nga naga-atubang sang critical level nga problema sa tubig.
Ginpahayag man ni Gorzal nga nagakinahanglan ang syudad sang 100 million liters per day nga supply sang tubig para sa ”domestic use” kag dugang nga 40 million liters para sa ”business use” gani padayon gid ang ila paghatag importansya sa insakto nga pagplano agud malikawan ang water supply interruptions.
Target man sang Iloilo City Government nga sa pag-abot sang tuig 2028, yara na sa 90 % ang Iloilo City ang may reliable nga access sa tubig.
