ILOILO CITY – Tanda sang pag-umpisa sang pinakadaku nga paskwa sa Simbahang Katoliko ang Miyerkules de Badles ukon Ash Wednesday.
Sa Good Morning Philippines program, ginpahayag ni Msgr. Meliton Oso, director sang Jaro Archdiocesan Social Action Center, nga ang Miyerkules de Badles ang umpisa sang 40 ka adlaw nga pagpanghanda spara sa pagkabanhaw ni Hesus.
Suno kay Oso, santo sa kasulatan, ang abo ang nagakadapat nga ginabubo sa ulo ukon ginapaligo apang tungod sa kadamuon sang Kristiyano nga nagasimba, mas ginpakamaayo nga ipalhit na lang ini sa agtang.
Ang krus suno kay Oso nga ginapalhit sa agtang ang simbolo sang pagkatampad kag pagtuo sa Ginuo rason nga indi dapat ini pag ipakita-kita ukon ipadayaw.
Ginpahayag ni Oso nga abo ang ginagamit agud nga ipahanumdom nga abo ang ginhalinan kag sa abo man kita tanan magabalik.
Samtang nagakabuhi, ginpahayag sang natungdan nga likawan dapat ang pagkamatinaas-taason bangud nga alalangay ang tanan sa mata sang Ginuo.
Nahibalu-an nga ang Miyerkules de Badles subong nga tuig ang natalana sa Pebrero 26.
