ILOILO CITY – Nagsugod na sang Lunes, Disyembre 28, ang pagpatigayon sang mobile swab testing booth sang Iloilo City Government sa Iloilo International Airport sa Cabatuan, Iloilo.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga tubtob subong padayon pa ang pag-abot sang mga locally stranded individuals, returning overseas Filipinos, kag authorized persons outside residence nga magabalik sa Iloilo City.
Suno kay Conlu, may mga gindeploy na nga medical staff ang Iloilo City Government agud magswab, magkuha sang information kag may yara man sang magadul-ong sa mga pumuluyo nga wala sang salakyan padulong sa syudad sang Iloilo.
Pahayag sang natungdan, bangud sa pagsug-alaw sang bag-ong tuig, magaresume ang mobile swab testing sa Iloilo International Airport sa Enero 2, 2021.
Samtang, gin-athag ni Conlu nga ang mga authorized persons outside residence nga magapaguwa sa Iloilo City, ang indi na kinahanglan i-swab.
Sa interview sang Bombo Radyo kay Conlu, iya ginpahayag nga Travel Authority na lamang ang kinahanglan.
Magluwas diri, kinahanglan man suno kay Conlu sang barangay certificate, medical certificate halin sa district doctors kag detalye sang flight.
Pahayag sang natungdan, mahimo makaguwa gilayon ang isa ka authorized persons outside residence sa syudad sang Iloilo basta kompleto lamang ang requirements.
