Mock drill ginpatigayon, preparasyon sa ti-on makasulod ag Maute sa Panay

ILOILO CITY – Nagpatigayon sang simulation exercise kag crisis emergency response exercise ang Philippine National Police (PNP) agud handaan ang posible pagsulod sang rebelde nga Maute sa Western Visayas.
Suno kay Iloilo City Police Office (ICPO) director Senior Supt. Remus Zacharias Canieso, kaupod nila sa nasambit nga aktibidad ang Philippine Army, Regional Maritime Unit (RMU), Philippine Coast Guard, Bureau of Fire Protection, kag Philippine Ports Authority.
Ini ang ginpatigayon sa isa ka mall sa Parola Wharf, Iloilo City.
Sa nasambit nga senaryo, ginsulod sang Maute group nga naghalin sa Marawi City ang siyudad sang Iloilo agud magpanggamo.
Nagsakay ang mga nagpakuno-kuno nga rebelde sa motor boat sa diin nag-agi ang mga ini sa Guimaras Strait kag nagdungka sa Parola Wharf apang likom sa ila ihibalo, sila ang namonitor na sang mga otoridad nga nagabantay sa police assistance desk.
Gilayon naman nga ginpalab-ot sang mga pulis sa Counterterrorism and Organized Crime (CTOC) ang nasiplatan nga mga rebelde.
Diri kag nagresponde na ang Coast Guard, PNP Maritime Office kag Philippine Army.
Apang sang nakita sang mga rebelde ang mga otoridad, diri kag nagbayluhanay sang lupok tubtub nagsulod ang Maute sa mall kag nang-hostage sang mga sibilyan.
Sa ulihi, ginhabuyan sang granada sang mga rebelde ang mall kag madamo ang pilason.
Ang mock exercise ang preparasyon sang mga otoridad sa tion nga mag-angkon sang spillover ang kinagamo sa Marawi.