Ginalauman ang moderate to heavy traffic subong semana sa Iloilo City kasunod sang pagtukod sang mga stages para sa judging areas sang Dinagyang Festival 2025.
Sa interview sang Bombo Radyo kay Ret. Police Colonel Uldarico Garbanzos, head sang Iloilo City Traffic Management Unit, iya ginpahayag nga tatlo ka staging area ang pagatukoron santo man sa sulat sang Iloilo Festivals Foundation, Inc. (IFFI).
Suno kay Garbanzos, ang judging area number 3 ang ipahamtang sa Mabini-Delgado St. rason nga kon naghalin ang motorista sa City Proper, indi na ini makaderetso sa nasambit nga dalan.
Ihamtang naman ang judging area number 4 sa Quezon-Ledesma St. kon sa diin, kon naghalin sa City Proper, indi na mahimo makaagi sa amo nga dalan.
Gin-athag man sini nga bangud sa mga judging areas, magapatuman sang rerouting scheme ang traffic enforcers.
Lakip man sa mga mahimo magtuga sang pagpugok sang trapiko sa syudad amo ang pagpatukod sang mga food stalls sa city proper nga isa sa highlights man sang Dinagyang Festival.
