Naghuyhuy ang abaga sang pila ka mga health workers nga gin-deploy sa Western Visayas Medical Center (WVMC) matapos ginapahayag maskin isa ka bes, wala sang may nabaton nga sweldo.
Sa interview sang Bombo Radyo kay alyas Hazel, nagatrabaho bilang respiratory therapist sa WVMC, iya ginpahayag nga gin-hire sila sang Iloilo Provincial Government kag gin-deploy sa nasambit nga ospital umpisa sang Hunyo 16 kag magalawig ang ila kontrata tubtob Septyembre 15.
Suno kay Hazel, na-kompleto kag napasa na nila ang requirements nga ginapangayo agud makakuha sila sang sweldo.
Apang ginapahayag manugtapos na ang ila kontrata, wala man sila sa gihapon sang may nabaton.
Pahayag niya, kun sa follow up lang, quota na sila, apang ginapahayag ginpasalig lang sila sang Iloilo Provincial Government nga gina-proseso na sa Accounting ang ila nga payroll.
”Ang amon nga payroll ara pa lang kuno sa Accounting, ti hasta subong wala gid. 2 weeks na lang matapos na contract namon pero hasta subong wala kami gihapon na-swelduhan.”
Nagpanawagan man ang natungdan sa gobyerno nga kuntani hatagan man sang solusyon ang tuman ka delayed nila sweldo bangud ang iban sa ila ang wala na sang inugbayad para sa boarding house kag galastuhon para sa adlaw-adlaw nga kinahanglanon.
Dugang pa niya, tuman na ka pin-ot para sa ila ang pagsulay sa risgo sang ila trabaho sa pag-atipan sang COVID-19 patients sa diin ginpangabudlayan man nila ang ila ginahingyo nga sweldo.
Ini ang rason suno sa iya nga kuntani maluoy man sa ila ang gobyerno.
”Gasulod gid kami ya sa COVID patient amo na biskan pang-allowance lang namon, kabudlay gid ya wala gid kami may nabaton.”
