Modernisasyon ang isa sa mga ginatudlo nga rason kun ngaa may overloading sa mga pampubliko nga salakyan.
Sa interview sang Bombo Radyo kay Elmer Forro, Secretary General sang Bayan Panay, iya ginpahayag nga bangud sa modernisasyon, 172,000 traditional jeepneys ang nadula sa operasyon sa bilog nga pungsod kag 128,000 nalang ang padayun nga nagabyahe.
Ginpakigbahin man niya nga sa siudad kag probinsya sang Iloilo, yara na lang sa masobra 1,700 ang padayun nga naga-operar nga jeep halin sa 2,500 nga numero sini.
Suno kay Forro, may yara lang sang 60,000 ka mga modernized jeepney ang pungsod kun sa diin kulang gid ini para sa publiko.
Pahayag man niya nga na-antisipar na nila nga magatuga sang public transportation crisis ang nasambit nga modernisasyon samtang nga ginaduso palang ini.
Dugang pa niya nga nagakapilitan nalang man nga magsakay ang mga pasahero sa nagaginutok nga modernized jeep bangud nga magamay lang ang nagabyahe nga pampubliko nga salakyan.
