𝗜𝗟𝗢𝗜𝗟𝗢 𝗖𝗜𝗧𝗬 – Ginpa-Bombo ang Iloilo City Police Station 4 sang pamilya sang isa sa mga suspek nga nagluthang-patay sa 18-anyos nga lalaki sa MH Del Pilar Street, Barangay Taal, Molo, Iloilo City.
Ang biktima amo si John Chris Mark Gapol, residente sang Barangay Calumpang, Molo, Iloilo City.
Ang isa sa mga suspek nga ginapahayag nga ginkastigo amo si si Ryan Kent ‘RK’ Magbanua, residente sang Barangay Calumpang, Molo, Iloilo City.
Sa interview sang Bombo Radyo kay Mrs. Elizabeth Magbanua, iloy ni Ryan Kent, iya ginpahayag nga nakibot ini sang madamo na sang bukol kag lagob ang iya anak sang nagbisita sila sa presuhan.
Suno kay Magbanua, gin-ako mismo sang iya anak nga ginkastigo ini sang mga pulis matapos gindakop bangud sa ginapahayag kaangtanan sini sa kamatayon ni Gapol.
Sang nakita sang iloy ang iya anak, daw kaangay suno sa natungdan nga gin-torture ang iya anak.
Magluwas diri, gin-akusaran man ni Magbanua ang mga pulis nga gin-harass ang suspek sang gin-aresto pa lang ini sa ila balay sa diin nasaksikan ini mismo sang iya anak.
Gin-athag sini nga wala niya ginpadako ang iya anak nga kriminal.
