Ginpasalig sang Molo Police Station ang maid-id nga imbestigasyon natuhoy sa kontrobersyal nga kamatayon sang isa ka nagabusong nga iloy kag ang iya ginadala nga lapsag matapos ginapahayag ginkastigo sang mag-asawa nga maestra kag retirado nga pulis sa Zone 5, Boulevard, Molo, Iloilo City.
Sa exclusive interview sang Bombo Radyo kay Police Major Marlyn Roquero, hepe sang Molo Police Station, iya ginpahayag nga nagkalain-lain ang nangin pahayag sang pamilya sang iloy nga si Lorry Mae Baylon, 27 kag mag-asawa nga si Chona Agana, isa ka maestra sa Molo 1 Elementary School kag bana niya nga si retired Police Staff Sergeant Joseph Agana.
Suno kay Roquero, matapos ang natabo nga pagbinaisay sang Marso 24 sa tunga ni Baylon kag mag-asawa nga Agana nga gin-intrahan pa sang ila mga bata kag umagad, lunsay nagpablotter ang duha ka grupo sang amo nga adlaw.
Pahayag ni Roquero, maga-atubangay kuntani sang Marso 30 sa barangay hall sanday Baylon kag pamilya Agana apang wala nadayon bangud wala ang Punong Barangay sang amo nga adlaw.
Marso 31, wala man nadayon ang nasambit nga pag-atubangay bangud nagbleeding si Baylon kag gindala sa ospital.
Abril 1, sang nagbun-ag sang wala sa oras si Baylon sa iya anom ka bulan nga lapsag nga napatay matapos ang ginabanta isa ka oras.
Abril 2 sang ginbawian man sang kabuhi ang iloy nga si Baylon.
Ginahulat pa nila ang resulta sang autopsy examination sa bangkay ni Baylon agud matul-id ang matuod nga gintunaan sang iya kamatayon.
Padayon naman nga nagapanindugan ang pamilya Agana nga wala sila nagpangamot sa iloy nga si Baylon.
