ILOILO CITY – Nagsapol ang Iloilo City Police Office, bar owners kag ang Iloilo City Government tuhoy sa Executive Order 46 nga nagadula sa Liquor Ban sa syudad sang Iloilo.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga ginplastar sa pagsinapol ang kaundan sang Exective Order 46.
Suno kay Defensor, ‘One Strike Policy’ ang ipatuman ni Mayor Treñas sa diin gilayon nga bawi-an sang business permit ang mga commercial establishment nga magalapas sa pagsulundan.
Ginpahayag ni Defensor nga lakip sa dapat nga sundon sang tagsa ka bar owner amo ang pagpahamtang sang functional nga Closed Circuit Television camera sa sulod sang commercial establishment, pagpahamtang sang security personnel ukon bouncer kag ang pagdumili sa pagbaligya sang makahulubog nga ilimnon sa mga menor de edad.
Para naman sa mga magagmay nga negosyante nga indi makasarang nga magbayad, mahimo man nga mag-share sa security personnel ang duha ka magka-iping nga commercial establishment, depende sa ginkasugtan sang tag-iya.
Maga-umpisa naman sa Martes, ang monitoring sa tagsa ka mga commercial establishment sa syudad sang Iloilo.
