May na-report na nga mga kaso sang monkeypox sa United Kingdom, Espanya, Portugal, Italya, kag Estados Unidos subong nga semana — isa ka makabig rare occurrence sang virus nga na-rekord lang anay sa central kag western Africa.
Gin-report sang US ang una nga monkeypox case subong nga tuig sang nagligad lang nga Myerkules. Ang una nga kaso amo ang lalaki sa Massachusetts. Nagpahayag man ang New York City’s health department nga may posible nga kaso man nga ginasundan subong.
Sa U.K., siyam ka mga kaso ang nareport halin sang Mayo.
May isa sa Italya, 14 sa Portugal, pito sa Spain kag may 22 ka suspected cases.
May suspected case man sa France.
ANO ANG MONKEYPOX?
Nalakip ang monkeypox sa family of poxviruses kun sa diin included man ang smallpox.
Nadiskubrehan ini sang scientists sa laboratory monkeys sang 1958.
Ang first monkeypox case sa tawo ang na-diagnose sang 1970.
Halin sang amo nga tion, na-rekord kag nag-concentrate ini nga infection sa Democratic Republic of the Congo kag sa Nigeria.
Ang sahi sang monkeypox nga natumod sang damlag lang sa U.S. kag sa European countries ang ginalaragway nga “milder disease” ipaanggid sa iban nga common branch sang virus.
PAANO MA-INFECT SANG MONKEYPOX?
Makuha sang tawo ang monkeypox paagi sa mga sapat — posible paagi sa kagat ukon scratches.
Pwede ini nga malaton sang tawo sa isa pa ka tawo paagi sa exchange sang large respiratory droplets kun nagakadugayan ang face-to-face contact.
Pwede man nga ma-expose ang tawo sa direct contact sa bodily fluids ukon contaminated items kaangay sang panapton ukon bedding.
Ang newly identified cases sa Europe ang na-rekord sa mga lalaki nga nakapakighilawas sa kaangay nga lalaki, apang ginapahayag nga ang monkeypox ang indi makabig nga sexually transmitted infection.
ANO ANG MGA SINTOMAS NGA DAPAT BANTAYAN?
Masami nga lima tubtub 21 ka adlaw ang ginalawig antes nga makit-an ang mga sintomas sang monkeypox.
Lakip sa mga initial symptoms amo ang mataas nga temperatura sang lawas, pagpalanakit sang ulo kag likod, muscle aches, swollen glands, pagpalangurog kag pagbatyag sang kakapoy.
Magatuhaw ang rashes isa tubtub lima ka adlaw pagkatapos sang una nga tion nga nakit-an ang sintomas. Nagaumpisa ang rashes sa nawong kag nagalapta sa iban nga bahin sang lawas.
Kun kaisa masal-an ini nga daw sulalob.
Ginapahayag nga nagalawig ang sintomas sa sulod sang duha tubtub apat ka semana, apang may pila ka tawo nga nagakinahanglan gid sang hospital treatment.##
