Mas nagapalapit pa ang “Monster Ship” sang China Coast Guard (CCG) sa barko sang Philippine Coast Guard (PCG) nga ginpadala sa Sabina Shoal sa West Philippine Sea.
Suno kay Coast Guard spokesperson for the West Philippine Sea Commodore Jay Tarriela, ang higante nga barko sang CCG nga amo man ang pinakadaku nga Coast Guard ship sa kalibutan ang nahamtang ginabanta 500 yards lamang halin sa pinakadaku nga barko sang PCG.
Antes sini, ini nga barko sang China nga may numero nga 5901 ang nasiplatan sa kalayuon nga 0.5 nautical miles ukon 1,012 yards halin sa barko sang Pilipinas nga BRP Teresa Magbanua (hull number 9701).
Una naman nga ginpahayag ni Tarriela nga makapila ka beses nga nagpaguwa sang radio challenges ang barko sang Pilipinas batok sa barko sang China apang nagapadayon lang ini sa paglayag.
Ang “Monster Ship” ang naghalin sa Hainan Island sang Hulyo 1, nag-abot sa Ayungin (Second Thomas) Shoal sang Hulyo 3, kag nagpalapit pa sa Mischief Reef before antes nagdiretso sa Escoda Shoal sang amo man nga adlaw.
Sa pihak nga bahin, matandaan nga ginpadala sang Pilipinas ang BRP Teresa Magbanua sa West Philippine Sea sang Abril 16 matapos ginsuspetsahan nga may reclamation nga ginahimo ang China sa Escoda Shoal nga nahamtang 75 nautical miles halin sa baybayon sang Palawan ukon sulod pa sa exclusive economic zone sang Pilipinas.
