Gin-report sang anay United States Air Force official kag maritime security expert nga si Ray Powell nga nagsulod sa teritoryo sang Pilipinas partikular malapit sa Panatag Shoal ukon Scarborough Shoal sa West Philippine Sea ang pinakadaku nga coast guard ship sa kalibutan.
Ini amo ang 165-metros nga barko sang China Coast Guard nga may bow number nga 5901 ukon ang ginatawag nga “Monster Ship.”
Sa post ni Powell sa X, ginpahayag nga may kaupod pa ini nga isa ka barko man sang China Coast Guard.
“Over the past 24 hours, the world’s largest coast guard ship, the 165-meter China Coast Guard 5901, together with the 102-meter CCG 5203, conducted a brief intrusive patrol into the Philippines’ exclusive economic zone west of Scarborough Shoal,” suno kay Powell.
Ginpaathag pa sang maritime expert nga ang pagpatrolya sang China sa exclusive economic zone sang kaiping nga mga pungsod ang nagatuyo nga mag-establisar sang padayon nga presensya kag i-normalize ang Chinese jurisdiction sa areas nga iya na kuntani sang iban nga mga pungsod base sa international law.
Kahapon, Mayo 24, nakit-an ini sa kalayuon nga 50 nautical miles sang Panatag Shoal suno kay Philippine Navy spokesperson for the West Philippine Sea Commodore Roy Vincent Trinidad.
“The actions, the response will be at the NTF-WPS level. It’s a Chinese coast guard ship and there will be [an] appropriate response from the NTF, the Coast Guard,” suno sa opisyal.#
