Indi na makit-an sa vicinity sang El Nido, Palawan ang pinakadaku nga barko sang China Coast Guard (CCG) ukon ang ginatawag nga “monster ship.”
Base sa West Philippine Sea monitor, nakit-an ini nga naglabay sa Scarborough (Panatag) Shoal ‘las syete kahapon sang aga.
Suno kay US Air Force official kag anay ex-Defence Attaché Ray Powell, nakit-an ang CCG ship nga may bow number 5901 nga naglabay sa ginabanta isa tubtub duha ka kilometros halin sa Panatag shoal.
Suno kay Powell, ang Panatag amo na ang katapusan nga lugar nga ginbisita sang amo nga barko sa sulod sang exclusive economic zone sang Pilipinas.
Sang Martes, ini nga higante nga barko nga nagabug-at sang 12,000 tonelada ang nasiplatan malapit sa El Nido nga rason sang tuman nga kahangawa sang publiko kun ano ang tuyo sini. Nahamtang ang barko 40 nautical miles halin sa baybayon ukon guwa pa 12-nautical mile territorial sea sang amo nga coast town.
Ang territorial sea amo ang ginakabig nga red line kag pananglitan maglampas ukon magtabok diri ang barko sang China, makabig na ini nga direkta nga pamahog sa soberanya sang Pilipinas.
Antes sa El Nido, nakit-an man ini nga monster ship nga naglabay sa pila pa ka maritime features sang Pilipinas sa Kalayaan Island Group (KIG) kag iban pa sa Spratly Islands suno pa kay Powell.
Ginpahayag nga sang Lunes sang aga, nasiplatan man ini malapit sa Ayungin (Second Thomas) Shoal kag sa Escoda (Sabina) Shoal sang Lunes naman sang hapon.
Ini nga presensya sang monster ship ang natabo inadlaw lang matapos natabo ang pagpang-harass sang China Coast Guard sa mga sakayan sang Pilipinas sa Ayungin Shoal sang Hunyo 17 kun sa diin isa ka Navy personnel ang nautdan gid sang tudlo.
