ILOILO CITY – Magapatuman sang moratorium ang Iloilo provincial government sa paghatag sang quarry permit para sa mga suba sa probinsiya.
Sa interview sang Bombo Radyo Iloilo, ginpahayag ni Iloilo Governor Arthur Defensor Sr. nga limitahan na ang quarry operation sa probinsiya.
Suno sa gobernador, tuman na ka dalom sang mga suba bangud sa sobra-sobra nga pagkalkal sang mga quarry materials.
Indi masarangan sang Provincial Environment and Natural Resources Office (PENRO) nga bantayan ang mga suba suno sa gobernador, gani importante ang bulig sang mga barangay officials.
Nagakabalaka naman ang PENRO sa pagdalom sang mga suba sa probinsiya.
Ginpahayag sa Bombo Radyo ni PENRO officer Atty. Arturo Cangrejo nga posible makaapekto sa mga taytay ang pag-usmod sang duta.