𝗜𝗟𝗢𝗜𝗟𝗢 𝗖𝗜𝗧𝗬 — Magapataas sang rate sang kuryente ang MORE Electric and Power Corporation sa billing cycle sang bulan Hulyo.
Ini kasunod man sang artipisyal nga manubo nga mga rate sang Hunyo bangud sa gin-untat nga mga balayran sa Wholesale Electricity Spot Market (WESM).
Ginmando man ang tikang sang Energy Regulatory Commission (ERC) Order sang Hunyo 13, 2024.
Suno sa MORE Electric and Power Corporation, ang average residential rate magataas sa P12.8566 kada kilowatt-hour sa bulan sang Hulyo, ini bangud man sa pagtaas sang generation charge.
Ginpahayag man sang korporasyon nga ang generation rate ang magataas sang P3.5739 gikan sa nauna nga rate nga P3.9833 sang Hunyo pakadto sa P7.5572 subong nga bulan.
Gin-athag man sang power distribution company nga ang mga rate sang nagligad nga bulan dapat mas mataas sangsa bulan sang Mayo, apang ginbuhinan sang MORE Power ang ila rate sang P2.5514 kada kilowatt-hour nga nagresulta sa P8.7749 kada kilowatt-hour; ini kasunod man sang mando sang Energy Regulatory Commission nga i-postpone ang pagkolekta sang Wholesale Electricity Spot Market charges.
Katuyuan sini nga deferment nga mapahagan-hagan ang pinansyal nga epekto sa mga konsumidor sa tunga sang serye sang red and yellow alerts sa Luzon kag Visayas Grids.
Sa interview sang Bombo Radyo kay Niel Parcon, ang Bise Presidente sang MORE Power para sa Corporate Energy Sourcing and Regulatory Affairs (CESRA), ang pagtaas sa bulan sang Hulyo ginapaabot bangod sang mas mataas nga mga balayran sa generation charges.
Gin-athag sini nga kun wala ang deferment, ang residential rate sang MORE Power sa Hunyo kuntani P11.8642 per kWh, gamay nga pagtaas gikan sa rate sang Mayo nga P11.3263 per kWh.
Ginpatpat man sang natungdan nga ang MORE Power’s Distribution, Supply, and Metering charges ang magapabilin sa P2.3376 kada kWh. Ini nga bahin sang rate amo lamang ang kantidad nga nagakadto sa distribution utility.
Sa pihak sang pagtaas sang power rates sini nga Hulyo, nagapabilin nga isa sa pinakabarato nga electric power distribution utilities ang MORE Power sa Visayas, padayon nga nagatanyag sang competitive rates sa mga konsumidor sa syudad sang Iloilo.
