ILOILO CITY – Gin-athag sang More Electric and Power Corporation (MORE Power) nga daan nga transformer kag gabok nga cross-arm ang rason sang nagluntad nga apat ka oras nga brownout sa distrito sang Molo.
Sa interview sang Bombo Radyo kay Jonathan Cabrera, tagpamaba sang nasambit nga power distribution company, iya ginpahayag nga pasado 10:00 sa gab-i sang naglupok ang transformer sang isa ka pribado nga establisemento sa Avanceña Street sa amo nga distrito.
Suno kay Cabrera, naapektuhan sang paglupok ang apat ka feeders sang Molo Substation rason nga apektado man pati ang bilog nga distrito sang Arevalo magluwas lang sa Barangay So-oc.
Nagbalik ang kuryente 2:26 na ang takna sa aga.
Indi kaangay sa nauna na nga natabo nga power interruptions sa syudad kun sa diin ginpahayag sang MORE Power nga may pagpangsabotahe nga natabo, gin-athag ni Cabrera nga aksidente lang ang natabo sa amo nga transformer.
Ginpahayag pa ni Cabrera nga nalakip ang amo nga gabok nga cross-arm sa natalana nga paga-ilisan sang MORE Power sa ila ginapatigayon nga Preventive Line Maintenance.
Lauman man suno sa natungdan ang iban pa nga brownout sa tion nga ipatigayon ang line works sa syudad sang Iloilo.
