Gin-athag sang MORE Electric and Power Corporation nga ang na-eksperyensyahan nga unscheduled power interruption sa pila ka bahin sang syudad kag probinsya sang Iloilo ang may kaangtanan sa ginpagwa nga alert status sang National Grid Corporation of the Philippines ukon NGCP.
Sa interview sang Bombo Radyo kay Angel Tan, Strategic Communication Officer sang MORE Power, iya ginpahayag nga isa sa mga rason sang sitwasyon amo ang pagkadula sang operasyon sang pila ka power plants.)
Suno kay Tan, naghalin ini sa pag-trip sang 500-kilovolt Tayabas-Ilihan kag Ilihan-Dasmari as transmission lines, lakip na ang pag-trip sang duha ka major transmission lines nga nagresulta sa pagkadiskonekta sang 2,462.1 megawatts nga national gas-fired capacity halin sa bahin sang Luzon Grid.
Ginpahayag man niya nga bangud may problema na sa generation kag supply side, napilitan ang NGCP nga magpagwa sang alert status agud maprotektahan ang power grid.
Dugang pa ni Tan, indi ini planado nga problema bangud gintuga ini sang pag-trip sang transmission lines nga alagyan sang suplay sang kuryente halin sa bahin sang Luzon.
Samtang, ginpahayag man ni Tan nga ginpatuman ang rotational power interruptions ukon manual load dropping sa pila ka bahin sang syudad kag probinsya sang Iloilo agud malab-ot ang kinahanglan nga watts deload kag malikawan ang mas mabug-at nga problema sa suplay sang kuryente.
Suno pa kay Tan nga indi lamang ini limitado sa Western Visayas bangud ang ginapatuman nga manual load dropping nagadepende sa pila ka megawatts ukon load reduction nga ginakinahanglan sang NGCP sa kada rehiyon.
Sini gid lamang nga hapon, ginpahibalo naman sang National Grid Corporation of the Philippines nga ipaidalom ang Visayas Grid sa Yellow Alert halin alas singko subong nga hapon tubtub alas otso sa gab-i.
Gina-isyu ang YELLOW ALERT kun indi bastante ang operating margin agud malab-ot ang contingency requirement sang transmission grid.
