Gin-utod sang MORE Power ang kuryente sa barangay hall, day care center, health center, covered gym, kag tanod outpost sang Brgy. Alalasan, Lapuz bangud sa utang nga naglab-ot sa kapin P686,000.
Sa interview sang Bombo Radyo kay PB Jofel Ladiet, iya ginpahayag nga ang gupliyada nga pag-utod sang kuryente sa mga nasambit nga mga pasilidad sa ila lugar ang makabig niya nga isa ka dako nga palamangkutanon.
Suno kay Ladiet, naglab-ot sa masobra P500,000 ang penalty halin sa illegal connection nga ginbilin sang nagligad nga administrasyon.
Samtang P100,000 naman ang regular bill.
Nahibaluan nga ang utang ang naghalin pa sang tuig 2021 tubtob 2023 sa panahon ni anay PB Maricon Sumpio.
Nakigsapol na si PB Ladiet sa barangay council sa subong nga administrasyon para sa pagbayad sang utang apang nagpamalibad ang mga ini kag indi mag ako sang responsibilidad bangud indi sila ang responsable sa amo nga illegal connection.
Sa subong, apektado ang serbisyo sa barangay bangud wala sang kuryente.
Gintugutan naman sang Iloilo City Government nga makabayad ang barangay sang masobra P95,000 para sa bill halin Hunyo tubtob Nobyembre 2023 sa masunod nga tuig.
