ILOILO CITY – Ginakabig sang MORE Electric and Power Corporation nga mabug-at nga akusasyon ang pahayag sang Panay Electric Company batok kay Hon. Emerald Contreras, presiding judge sang Branch 23 sang Ramon Avanceña Hall of Justice.
Ini matapos nga sa ginpatigayon nga press conference sang Panay Electric Company, ginpahayag ni Atty. Estrella Elamparo, legal counsel sang kompaniya nga ginapanag-iyahan sang pamilya Cacho, nga nagkitaay sanday Contreras kag ang Filipino billionaire nga si Enrique Razon, tag-iya sang MORE Power, antes ginpaguwa ang desisyon sa Writ of Posession.
Sa interview sang Bombo Radyo kay Jonathan Cabrera, tagpamaba sang MORE Power, iya ginpahayag nga mabug-at nga akusasyon ang ginpato-pato batok kay Contreras.
Kadungan sini, gin-athag ni Cabrera nga ang mga personnel na sang MORE Power ang nagadumala sa lima ka substation kun sa diin apat diri ang iya nga napadulungan kaina sang aga.
May kaangtanan naman sa mga teknikalidad tuhoy sa legal battle sa tunga sang duha ka kompaniya, ginpahayag ni Cabrera nga iya na lang itugyan sa Presidente sang MORE Power nga si Roel Castro kag sa mga legal counsel ang pagsabat tuhoy diri.
Suno naman kay Atty. Hector Teodosio, legal counsel sang MORE Power, makabig nga libel ang nasambit nga pahayag ni Atty. Estrella Elamparo.
Kun indi matuod ang nasambit nga pahayag, mahimo nga makasuhan si Elamparo kag ang mga nagpakigbahin agud nga matigayon ang press conference kun sa diin nakabuya sang nasambit nga pahayag ang legal counsel sang Panay Electric Company.
Agud nga indi makabig nga pagpangguba ang nasambit nga pahayag, kinahanglan suno kay Teodosio nga pamatud-an ni Elmaparo nga nagkitaay sanday Contreras kag Razon.
May kaangtanan naman sa Certificate of Public Convenience and Necessity, ginpahayag sang natungdan nga apisar wala pa sang may gina-uyatan ang MORE Power apang mahimo sa gihapon nga maka-operate ang kompanya paagi sa franchise law.
