Ginklaro sang MORE Power nga wala sila nagapili kun diin ukon san-o ipatuman ang power interruptions ukon manual load dropping sa ila service area.
Sa interview sang Bombo Radyo kay Angel Tan, spokesperson sang MORE Power, iya ginpahayag nga ang National Grid Corporation of the Philippines ukon NGCP ang nagamonitor sang actual power demand sa bug-os nga Visayas.
Buot silingon ang korporasyon man ang nagadeterminar kon pila ka megawatts ang kinahanglan i-de-load sa kada lugar.
Pahayag pa sini bilang power distribution utility katungdanan sang MORE Power nga magpatuman sang ginhatag nga allocation sang NGCP sa mga feeder.
Ginatinguhaan man sang mga ini nga ma-rotate ang interruptions agud mangin patas sa mga consumer.
Nahibaluan nga nagsugod ang manual load dropping sang NGCP sang bulan sang Mayo kag nagapadayon ini tubtob subong nga Setyembre.
Ini bangud sa kakulang sang power supply ukon transmission capacity.
Nagapangabay naman ang MORE Power sa publiko nga hangpon ang sitwasyon bilang supply-related nga problema ang nagakatabo.
Dugang pa ni Tan, nagatinguha man ang MORE Power nga ma-manage ang mga interruption sa patas nga paagi agud indi tuman nga mabudlayan ang ila nga mga konsumidor.
