ILOILO CITY– Ginkumpirma sang MORE Electric and Power Corporation ang paghatag sang Regional Trial Court Branch 37 sang writ of possession sa distribution assets sang Panay Electric Company.
Sa interview sang Bombo Radyo kay Atty. Hector Teodosio, legal counsel sang MORE Power, iya ginpahayag nga sang Agosto 14 pa ginpaguwa ang nasambit nga order pinaagi kay Judge Yvette Go.
Suno kay Teodosio, sa nasambit nga order, gilayun nga ipatuman ang mando sa pag-posess sang assets sang PECO.
Ginpahayag ni Teodosio nga sa ano man nga oras, pagakuhaon na sang MORE Power ang tanan nga assets ang PECO nga nahamtang sa dalan General Luna.
Ang tanan nga linya sang PECO, softwares kag mga gamit ang ang kuhaon na sang MORE Power suno kay Teodosio.
Magapangayo man sila sang bulig sa Philippine National Police kag iban pa nga law enforcement agency sa pagpatuman sang nasambit nga mandu.
Magapahamtang man sila suno kay Teododio sang guwardya sa propidad sang PECO sa tion sang take-over agud malikawan ang pagpangsabotahe.
Ila man ginapasigurado suno kay Teodosio nga matigayun ang smooth transition.
Samtang ginapatigayun ang hearing sa mangin kompensasyon sa assets sang PECO suno kay Teodosio, ang MORE Power na ang magapadalagan sang power distribution sa syudad sang Iloilo.
Magapagwa sila sang abiso suno sa natungdan kun san-o ang deadline sang pagbayad sang kuryente sang mga konsomidor.Samtang, ginpahayag ni Mr. Ruel Castro, Presidente sang MORE Power nga ginasunod lang nila kun ano ang mga pagsulundan kag nangin consistent humalin sang sila ang nag-apply para sa prangkisa.
Handa na ang MORE Power suno kay Castro nga maghatag sang supply sang kuryente sa syudad sang Iloilo.
Ginpasigurado man sang natungdan sa mga konsumidor nga himuon sang MORE Power ang tanan para sa ikaayo sang serbisyo sa patag sang power distribution.
