ILOILO CITY – Ginpanindugan sang MORE Electric and Power Corporation nga ila na nga nakuha ang mga asset sang Panay Electric Company bilang bag-o nga electric power distributor sa syudad sang Iloilo.
Ini ang kasunod sang tensyonado nga pag take-over sang MORE Power sa tanan nga substations sang Panay Electric Company matapos ang desisyon ni Hon. Emerald Contreras, presiding judge sang Branch 23 sang Ramon Avanceña Hall of Justice, sa Writ of Possession pabor sa bag-o nga power distributor.
Sa interview sang Bombo Radyo kay Atty. Hector Teodosio, legal counsel sang MORE Power, iya ginpahayag nga matapos ang pag take-over sa tanan nga substations sang Panay Electric Company, ang MORE Power na ang magadumala sa nasambit nga assets magluwas lang sa lote kag sa administrative building.
Suno kay Teodosio, sa sulod sang pila ka adlaw, ginalauman nga makansela na ang Certificate of Public Convenience and Necessity sang Panay Electric Company baliskad sa nangin pahayag sang administrative manager nga si Marcelo Cacho nga sila sa gihapon ang tag-iya sang assets matapos ginkasugtan ang status quo.
Ginpahayag ni Teodosio nga umpisa subong, ang personnel na sang MORE Power ang magadumala sa assets kag kun magpahilabot pa ang personnel sang Panay Electric Company, mahimo na nga magpatunga ang mga pulis.
Para sa mga konsumidor nga magabayad sang bill subong nga bulan, mahimo pa sila nga makabayad sa Panay Electric Company.
Nahibalu-an nga nauna na nga ginpahayag ni Marcelo Cacho nga ang ila pamilya sa gihapon ang tag-iya sang assets bangud nga padayon pa ang legal battle.
