Ginpasiguro sang MORE Electric and Power Corporation ang bastante nga power supply kadungan sang mga aktibidad sang Dinagyang Festival 2025 nga maga-require sang dako nga pagkonsumo sang kuryente.
Sa interview sang Bombo Radyo kay Engr. Christopher Serojano, deputy head sang Network Development and Operations Group sang MORE Power, iya ginpahayag nga binulan pa lang antes ang Dinagyang, napreparar na nila ang mga generators kag napadakuan ang mga transformers.
Suno kay Serojano, sa bahin sang main line, mas secured na ini bangud sa ginpatuman nga underground distribution system.
Ginpahayag man niya nga sa bahin sang food festival, naplanohan na ang mga appliances nga mahimo nila magamit sa mga kiosko agud nga malimitahan ang consumption sa kuryente.
Ginpat-ud man sini nga handa ang mga personnel sang MORE Power agud magresponde kon may matabo gid man nga problema sa linya sang kuryente sa palibot sang mga activity areas sang Dinagyang.
