ILOILO CITY – Ginbalik sang More Electric and Power Corporation sa developer sang Salas Real Subdivision sa Quintin Salas Street, Brgy. Tacas, Jaro, Iloilo City ang salabton sa problema sang mga homeowners nga masami nga wala sang kuryente.
Sa interview sang Bombo Radyo kay Joy Fantilaga, spokesperson sang MORE Power Iloilo, iya ginpahayag nga sang nagligad nga semana, natigayon na nga makadtuan sang ila representative ang mga homeowners.
Apang suno sa iya, wala na sang salabton ang ila kompaniya bangud nga may yara sang dapat nga i-comply ang developer agud nga matakdan sang suplay sang kuryente ang ginabanta 50 ka mga homeowners.
Dugang pa niya, sa club house gid lamang sang amo nga subdivision naga-tap ang mga homeowners nga makabig naman nga tuman ka delikado para sa ila.
Matandaan nga ginpa-Bombo sang pila ka homeowners ang tuman ka taas nga lebel sang baha bangud sang indi maayo nga drainage system kag wala sang suplay sang kuryente.
Sa sabat sang developer nga ACM Homes pinaagi sa isa ka text message, nagpangayo sila sang pasaylo sa natuga nga huol sa mga homeowners.
Apang, ginpasalig nila ang mga homeowners nga ginatinguhaan na sang ila kompaniya nga mapadasig na ang pag-address sang mga problema.
Nagpasalig sila nga sa masunod nga semana, masolbar na ang problema sa suplay sang kuryente.
May yara man sang mga delay sa pag-address sang problema apang ginapasalig sang ACM Homes nga magapabilin sa gihapon nga isa “better community” ang amo nga subdivision.
