Sa pagtalakay ni Presidente Ferdinand Marcos Jr. sa sektor sang enerhiya sa iya ika-apat nga State of the Nation Address (SONA), ginpabutyag sang MORE Electric and Power Corporation (MORE Power) ang suporta sini sa paglapad sang Lifeline Rate coverage para sa mga konsumidor ilabi na sa marginalized sector.
Sa interview sang Bombo Radyo kay Angel Tan, Strategic Communication Officer kag tagpamaba sang MORE Power, ginpahayag niya nga ang expansion sang Lifeline Rate magahatag sang daku nga oportunidad sa mga pumuluyo nga naga-obra sang minimum wage ukon may manubo nga konsumo sang kuryente.
Suno kay Tan, ini nga inisyatibo nagahatag kabakod sa prinsipyo nga ang access sa kuryente isa ka kinamatarong, indi lang serbisyo.
Sa subong, may 5,610 ka lifeline beneficiaries na ang MORE Power, kag ginapaabot nga ini nga numero magataas pa kasunod sang pahayag sang presidente nga palapadon ang coverage sang programa. Diri na kalakip indi lang ang 4Ps members kundi pati na ang iban nga kwalipikado base sa income kag konsumo.
Ginpasangkad man sang Energy Regulatory Commission (ERC) ang serbisyo sini paagi sa satellite office sa Iloilo City sang 2023, suno sa tripartite agreement upod ang Iloilo City Government kag MORE Power, agud mapadasig ang proseso sang Net Metering applications.
Ginpabutyag ni MORE Power President kag CEO Roel Castro nga ang kompanya padayon nga naga-invest sa moderno nga teknolohiya kag mga inobasyon nga nagapabaskug sang operational efficiency, kag ginaprayoridad ang mga programa nga nagahatag benepisyo sa marginalized sector.
