Nagapadayon ang MORE Electric and Power Corporation ukon MORE Power sa pag-upgrade sang ila mga pasilidad kag pag-coordinate sa Iloilo City Government kag iban nga stakeholders bilang pagpanghanda sa posible nga epekto sang El Niño sa suplay sang kuryente sa syudad kag probinsya sang Iloilo.
Sa interview sang Bombo Radyo Iloilo kay MORE Power skopesperson Angel Tan, iya ginpahayag nga padayon ang pag-upgrade sang substations, transformers kag power lines sang MORE Power agud mapabakod ang ila mga pasilidad kag mangin mas preparado sa posible nga epekto sang tuman nga kainit.
Ginpabug-atan ni Tan nga ang pagpanagtag sang kuryente sang MORE Power ang nagadepende man sa available nga supply halin sa generation kag transmission side.
Pagpaathag niya, kon indi makahatag sang bastante nga suplay ang mga power plant, mahimo nga padayon nga magapangatubang sang kakulangan sa supply sang kuryente ang mga consumers bisan pa preparado ang distribution facilities.
Suno pa kay Tan, naga-coordinate man ang MORE Power sa Iloilo City Government, ilabi na kay Mayor Raisa Treñas, agud makahatag sang regular nga updates angut sa sitwasyon sang mga power plants kag iban nga impormasyon nga ila nabaton halin sa mga partner sa grid.
Pahayag pa niya, bukas man ang ila opisina sa dugang nga koordinasyon kag pagsinapol upod ang National Grid Corporation of the Philippines (NGCP) agud masunod ang nagakaigo nga protocols kon may magluntad nga power supply shortage ukon magpatuman sang alert status kag manual load dropping.
Dugang pa nga ginapanawagan man sang MORE Power ang bulig sang mga konsumidor paagi sa responsable nga paggamit sang kuryente, ilabi na sa peak hours, agud mabuligan nga makontrol ang demand samtang gina-monitor ang sitwasyon sang suplay.
