ILOILO CITY – Kinahanglan nga doble ang enerhiya sang mga warriors sang tanan nga tribu nga magapasundayag sa highlight sang Dinagyang Festival 2020 bwas, Enero 26.
Ini ang pagpati sang isa ka Ilonggo artistic director kag international performer nga si Novie Bereber.
“Kinahanglan ma-feel sang tawo ang energy mo. Indi ni pareho sang una nga pwede ka makapahuway, subong ya, indi ka gid makapahuway,” pahayag ni Bereber, nga nagapatuhoy sa 360-degree performance sang mga tribu sa diin ginapahayag nga makit-an sang mga tumalan-aw sa tanan nga anggulo ang pasundayag.
“You can’t cheat this time.No. Wala ka may matago kay te makita na sang tawo ang props n’yo, tanan,” dugang pa ni Bereber.
Iya ginpahayag nga ginalauman man sang kaangay niya nga mga performers kag madugay na nga nagapasakop sa Dinagyang nga sa subong nga tuig, ‘more style, more ideas, more energy’ ang mahimo matanyag sang mga tribu nga maga-perform.
Buwas na patigayunon ang highlight sang selebrasyon kag ini ang pasakupan sang: Tribu Panayanon; Tribu Baybayanon; Tribu Ilonganon; Tribu Salognon; Tribu Hugponganon; Tribu Baryohanon; Tribu Paghidaet; kag, Tribu Dagatnon.
