ILOILO CITY – Sa pihak sang balatian nga breast cancer, wala ini nangin upang sa isa ka iloy agud tungdan ang iya papel bilang nanay kag lola kag bilang isa man ka Barangay Service Point Officer.
Ini amo si Luzviminda Francisco, 54, residente sang Calaparan, Arevalo, Iloilo City, may lima ka mga kabataan kag duha ka mga apo.
Sa interview sang Bombo Radyo kay Francisco, iya ginpahayag nga tuig 2023 sang gin-diagnose siya nga may cancer.
Apang wala ini nakasablag agud ,magpadayon ini sa kabuhi pinaagi sa pagserbe sa iya pamilya kag sa komunidad.
Pinaagi sa iya trabaho bilang Service Point Officer kag labandera, napaeskwela nila sang iya bana nga isa ka cook ang ila lima nila ka mga kabataan.
Sa subong, padayon si Francisco nga nagapakigbato sa balatian sa diin nagapasalamat ini sa suporta nga ginahatag sang iya pamilya.
Nahibaluan nga si Francisco ang ginkilala man bilang Most Outstanding Barangay Volunteer sa Western Visayas.
Napun-an naman sang emosyon ang pagpasalamat sang mga anak kag apo ni Francisco sa iya dedikasyon sa trabaho kag bilang iloy.
Sa interview sang Bombo Radyo kay Jasmin Joy Francisco Lambuson, subang sa lima ka mag-utod, iya ginpahayag nga sa pihak sang balatian sang iya iloy, sa gihapon nagapabilin ini nga mapag-on.
Ginpasigurado man ni Lambuson nga indi nila pagpabay-an ang iya iloy subong nga dalagko na sila sa diin ang iban sa ila ang may trabaho na.
