Ginpakigbahin sang Most Outstanding Secondary Student sang Iloilo Province nga tumandok sang Oton, Iloilo ang iya nga mga inagyan sa kabuhi nga apisar bata pa lang nagdala sa iya sang madamo nga kadalag-an sa patag sang iya nga pagtuon.
Ini amo si Princess Mae E. Salaysalay, 17 anyos kag Senior High School graduate sang Oton National High School.
Sa interview sang Bombo Radyo kay Salaysalay, gin-ako sini nga bata pa lang nahibaluan na sini sa iya kaugalingon nga agud makuha ang isa ka bagay nga gusto malab-ot kinahanglan nga pangabudlayan.
Bilang isa ka aktibo nga student leader, debater, kag extemporaneous speaker, ginakonsidera sini nga ang iya matutom sa pagbasa sa bata pa lamang nga edad ang nagdala sa iya sang madamo nga mga natun-an.
Suno sa iya, mas ginapili niya nga magkompetensya sa iya kaugalingon imbes nga ikumpara ang iya performance sa iban.
Dala ang iya positibo nga panan-awan sa kabuhi kag sa mga tawo sa iya palibot, wala ginakonsidera ni Salaysalay nga ang failure katapusan kundi redirection.
Nagbilin man ini sang mensahe sa kapareho niya nga kabataan, nga ang tagsa kag isa ang may yara sang kaugalingon nga kinaiya kag kusog sa pagpasangkad sa iya kaugalingon sa paagi nga maayo nga paagi.
