Ginkapakigbahin ni Most Reverend Jose Romeo Lazo, D.D. ang iya kalipay sa pagselebrar sang iya golden sacerdotal anniversary kadungan man sang iya retirement.
Sa interview sang Bombo Radyo kay Most Reverend Jose Romeo Lazo, iya ginpahayag nga dako gid ang iya pagpasalamat sa Dios sa paghatag sang kahigayonan agud nga maka-pangalagad sa katawhan.
Ginpasalamatan man niya ang mga tumuluo sa ila gugma kag katutom, kag nagpanawagan para sa padayon nga paghiliusa para sa synodality sa pagsaulog sang Jubilee Year of Hope.
Nagpasalig man si Archbishop Lazo kay Archbishop Midyphil Billones sang iya pagtuytoy kag pag-upod samtang nagasugod ini sang iya pagpanglakaton upod sa Katawhan sang Dios bilang Shepherd sang Archdiocese of Jaro.
Sa iya homily kaina, ginlaragway ni Lazo ang iya kabuhi bilang isa ka pari nga simbolo sang paglab-ot sa iban kag ang Dios nagalab-ot sa iya.
Nag-retire si Lazo agud mahatagan sang dalan ang pormal nga pagpungko ni Archbishop Midyphil “Dodong” Bermejo Billones bilang bag-o nga arsobispo buwas nga adlaw, Abril 2.
Nahibaluan nga si Most Rev. Lazo ang tumandok sang San Jose, Antique kag gin-ordinahan sang Abril 1, 1975.
