ILOILO CITY – Dakop ang Most Wanted Person nga isa ka empleyado sang gobyerno sa One Time Big Time Operation sang Criminal Investigation and Detection Group (CIDG) Region 6.
Ang arestado amo si John Piermont Montilla, 44, kag residente sang Brgy. Tabucan, Mandurriao, Iloilo City.
Sa exclusive interview sang Bombo Radyo kay PMaj. Jess Baylon, pinuno sang CIDG-Iloilo City Field Unit, iya ginpahayag nga nadakpan si Montilla sa sulod sang isa ka hotel sa Brgy. Bolilao, Mandurriao, Iloilo City pinaagi sa gahom sang warrant of arrest sa kaso nga Republic Act (RA) 10175 ukon Cybercrime Prevention Act of 2012.
Suno kay Baylon, nag-ugat ang kaso matapos nagpasaka sang reklamo sang isa ka social media user matapos nagpost sang sala nga impormasyon si Montilla batok sa iya.
Suno kay Baylon, gin- isyu ang nasambit nga warrant of arrest sang Nobyembre 23, 2020 ni Judge Maria Victoria Soriano Villadolid sang Branch 24 sang Manila Regional Trial Court.
Sa subong yara na si Montilla sa Special Operations Unit sang CIDG.
