Molo, Iloilo City – Nagapang-agda sa tanan nga mga Ilonggo kag sa mga tumuluo ang Dominican Sisters Motherhouse nga magbisita sa Mother Rosario Museum.
Ang Mother Rosario Museum nga nahamtang sa compound sang Dominican Sisters Motherhouse ang makit-an sa Avanceña St., Molo, Iloilo City.
Sa interview sang Bombo Radyo kay Very Rev. Mo. Ma. Visitacion Alecto sang Dominican Sisters Motherhouse, iya ginpahayag nga ang museum gintukod bilang pagkilala kag pagpasidungog kay Maria Beatrice Rosario Arroyo ukon Venerable Mother Rosario nga tumandok sang amo nga distrito.
Suno kay Sister Visitacion, makit-an sa museum ang pila ka personal nga gamit ni Mother Rosario sang ini ang buhi pa.
Sa sulod sang museum, yara man ang chapel kun sa diin nakabutang urn nga nagaunod sang mga tul-an ni Mother Rosario.
Nahibaluan nga si Mother Rosario ang nagsulod sa Congregation of the Dominican Sisters sa St. Catalina of Siena sa Manila sang 1911 kag siya ang nagtukod sang Dominican Sisters of the Most Holy Rosary of the Philippines sang 1927 kaupod ang duha ka madre.
Apisar naghalin sa mangarranon nga pamilya si Mother Rosario, mabinuligon ini ilabi na sa mga kubos.
Sa subong, ang Dominican Sisters of the Most Holy Rosary ang nagadumala sang mga eskwelahan, retreat houses, charitable institution kag clinic.
Sang 2019,siya ang gindeklarar ni Pope Francis bilang Venerable nga kabahin sang proseso agud mangin isa ini ka santo.
Sunod nga proseso ang pag-beatify kag tawgon ini nga Blessed, kag ang canonization kag tawgon na ini nga Saint.
Kun matuman na, si Mother Rosario ang mangin labing una nga babaye nga santo halin sa Pilipinas.
