ILOILO CITY – Indi pa matumod sang otoridad kun bala naangot sa illegal drugs ang pagluthang-patay sa civilian agent sang National Bureau of Investigation sa Brgy. Democracia, Jaro, Iloilo City.
Sa interview sang Bombo Radyo kay Police Captain Eduardo Siacon Jr., hepe sang Jaro Police Station, iya ginpahayag nga tubtub subong, indi pa klaro kun ano ang matuod nga motibo sa krimen.
Suno kay Siacon, wala sang criminal record sa Jaro Police Station ang biktima nga si Angel Lademora sang Brgy. Camiri, San Enrique, Iloilo.
Ginpahayag ni Siacon nga antes pa man natabo ang insidente sang nagligad nga gab-i, naghalin si Lademora sa balay ni Atty. Rene Sarabia nga himata sang iya tiayon.
Nagapauli lang sa Brgy. Democracia si Lademora sa boarding house sang iya anak kag tubtub subong, wala pa nahibalu-an ang identity sang mga suspek.
Matandaan nga nakabati sang asud-asud nga lupok ang mga residente kag sang ila nakita, duguon na samtang nagahamyangon sa dalan ang biktima nga may igo sa ulo lapos sa likod.
