ILOILO CITY- Blangko sa gihapon ang mga pumuluyo sa motibo sa pagpatay sa anay job hire sang Iloilo City Hall sa isa ka birthday party sa Brgy. Tabuc Suba, Jaro, Iloilo City.
Sa interview sang Bombo Radyo kay Lorna Mendrez, tag-iya sang balay nga ginluntaran sang insidente, iya ginpahayag nga temprano pa siya nga nagtulog kagab-i bangud sa kakapoy sa pagpatigayon sang kahiwatan kag ginkakibot na lang niya sang nabati-an ang paglinupok.
Suno kay Mendrez, isa ka maayo nga tawo ang iya nga pagkilala sa biktima nga si Felix Argenal Jr., 30, sang Zone 3, Brgy. Tacas, Jaro, Iloilo City.
Ginpahayag ni Mendrez nga wala sila sang ihibalo sa kun sanday sin-o ang duha ka lalaki nga nagluthang sa biktima.
Sa pagpaathag sang natungdan, wala sang kudal ang ila balay bangud nga naguba sa Oplan Hawan kag mahapos lang ang pagsulod sa ila ugsaran.
Isa man sa ginalantaw ni Mendrez amo nga wala gid nakatalupangod ang iya mga himata kaupod ang biktima nga may nakasulod nga armado nga lalaki bangud nga bukas man ang pwertahan sang ila balay.
Mahimo suno kay Mendrez nga ginsundan ang biktima agud nga patyon.
Ginapahayag nga isa ka drug surrenderee ang biktima.
