Iloilo – Ginbasura sang Iloilo Provincial Prosecutor’s Office ang motion for reconsideration may kaangtanan sa kaso nga three counts of murder batuk sa lone survivor sang Estancia massacre nga si Jevron Parohinog kag sa apat ka iban pa nga mga identified suspects kag anum ka mga John Does.
Matandaan nga natabo ang pagpangluthang sa Villa Panian, Estancia, Iloilo sa diin tatlo ka mga mag-abyan ang ginpamatay sang Septyembre 14, 2022.
Ang mga biktima amo sanday Chrysler Floyd Fernandez, residente sang Jereos, La Paz, Iloilo City; John Paul “JP” Mark Bosque sang Lopez Jaena Sur, La Paz, Iloilo City; kag Mark Clarenz Libao sang Tacas, Jaro, Iloilo City.
Ang iban pa sa mga ginpasakaan sang kaso amo sanday Jix Parohinog, Michael Porras, Michael Quiatchon, Benzen Llamado, kag anum ka mga John Does.
Sa ginauyatan sang Bombo Radyo Iloilo nga desisyon ni Assistant Provincial Prosecutor Ronilo Pamonag kag pirmado ni Provincial Prosecutor Ma. Elena M. Hofileña-Gerochi nga napetsahan Pebrero 17, nakit-an nga wala sang panibag-o nga mga substantial arguments ang Iloilo Police Provincial Office agud ma-reverse ang pag-dismiss sang kaso.
Nahibaluan nga ang nagpasaka sang kaso amo sanday Flover Fernandez, Remy Bosque, kag Jose Rabiel Libao nga pamilya sang mga napatay.
(ESTANCIA)
Ini ang gin-updan nanday Iloilo Police Provincial Office chief kag commander sang Special Investigation Task Group PALIBOSFER Police Colonel Noel Aliño kag Lieutenant Colonel Raymond Celoso nga amo ang Special Task Group Inter-Agency Coordinator sang Iloilo Police Provincial Office.
Matandaan nga gin-dismiss ang criminal complaint nga gin-file batok sa mga suspek nga sang Disyembre 10, 2022 bangud wala nakitaan sang meritorious ground agud mapadayon ang kaso kag magpatigayon sang preliminary investigation.
