Padayon pa nga ginapangita ang isa ka tripulante nga na-missing sang naglugdang ang isa motor tanker kag nagtuga sang oil spill sa Bataan.
Suno kay Philippine Coast Guard (PCG) spokesperson Rear Admiral Armand Balilo, ang MT Terra Nova ang involved sa amo nga insidente nga natabo 3.6 nautical miles sa nasidlangan sang Lamao Point sa Limay pasado ‘la una kaina sang kaagahon.
Ginpahayag nga 16 sa 17 ka crew ang na-rescue kun sa diin apat diri ang gindapatan gid sang nagakaigu nga pagbulong.
Suno pa sa PCG, pakadto kuntani sa Iloilo ang amo nga motor tanker samtang dala ang 1.4 million liters sang industrial fuel.
Ginkumpirma man sang ahensya nga base sa nakit-an sang gin-deploy nga aerial asset, na-monitor ang oil spill sa ginabanta 5.6-nautical miles sa nasidlangan sang Lamao Point nga may kalaparon nga duha ka nautical miles dala sang mabaskog nga hampak sang balod.
Sunod nga gin-mobilize ang marine environmental protection personnel para matapna ang padayon nga paglapta sang langis.
Nagbulig man ang barko sang PCG nga BRP Melchora Aquino sa search and rescue operations sa na-missing nga crew.
