Ginpa-Bombo sang pila ka mga motorista kag negosyante ang mahinay nga paghuman sang drainage system sa JM Basa Street, Iloilo City Proper.
Sa interview sang Bombo Radyo kay Honey Jade Diosana, isa ka vendor, iya ginpahayag nga bangud sa ginpasirado ang isa ka way sang dalan, nagtuga ini sang tuman nga pagpug-ok sang trapiko ilabi na kon may klase.
Suno kay Diosana, kontani, gab-i lang nila ginaubra ang drainage agud nga indi na makahatag sang dugang nga huol sa mga motorista kon adlaw.
Ginpahayag man sang negosyante nga tuman man ka gahod kon aga ang backhoe nga nagakutkot sa dalan.
Gin-ako naman sang natungdan nga apektado ang ila negosyo bangud man sa construction sang drainage.
Ginaduso naman sang Iloilo City Traffic Management Unit (ICTMU) nga dapat sundon sang kontraktor ang ila agreement nga dapat kompleto ang mga early warning devices nga ibutang sa JM Basa Street, Iloilo City Proper kon sa diin ginaubra ang drainage system.
Sa interview sang Bombo Radyo kay Ret. Police Colonel Uldarico Garbanzos, head sang Iloilo City Traffic Management Unit, iya ginpahayag nga ini agud nga mapabilin nga hilway sa kasablagan ang mga motorista kag negosyante sa lugar.
Suno kay Garbanzos, ‘subject for review’ pa ang mga permit sang proyekto kon sa diin, magapatuman man ang talatapan sang inspection sa lugar.
Gin-athag man sang natungdan nga may yara sang timeline ang construction plan kag kon indi nila ini masunod mahimo sila nga magmulta.
Nahibaluan nga masobra P49 million ang balor sang pondo nga gingamit sang Department of Public Works and Highways (DPWH) agud masugodan ang nasambit nga proyekto.
