ICPO DIRECTOR
ILOILO CITY-Magatukod sang Motorized Patrol Unit ang Iloilo City Police Office agud magtutok sa pagbantay sa motorcycle riding criminals.
Sa interview sang Bombo Radyo kay Pol. Col. Martin Defensor, director sang Iloilo City Police Office, iya ginpahayag nga ang Motorized Patrol Unit ang pagabug-usan sang mga kapulisan nga magasakay sa motorsiklo agud mag-roving sa syudad.
Suno kay Defensor, 32 ka mga well trained nga mga kapulisan ang igabutang sa nasambit nga unit.
Ginpahayag niya nga tungaon sa 16 ka pares ang 32 ka mga pulis nga ma-assign sa motorized patrol unit.
Apang suno kay Defensor, ang 16 ka mga motorsiklo ang magahalin sa Iloilo City Government.
Sa tion nga mabaton na sang Iloilo City Police Office ang nasambit nga mga motorsiklo, suguran gilayon ang paghanas sa sulod sang 45 ka adlaw sa mga mangin miembro sang Motorized Patrol Unit.
Dugang pa sang director nga ini nga mga pulis ang mangin equipped sang nagakaigo nga mga equipment kangay sang radyo kag automatic assault rifle.
Tungaon man ang ini nga unit sa tanan nga mga distrito sa Syudad sang Iloilo kag may yara man sang day kag night nga shifting.
