Narekober sang mga otoridad sa Tagbak, Jaro ang motorsiklo nga gingamit sa paghold-up sang suspek sa isa ka collector sang motor parts supplier kahapon nga adlaw kun sa diin nataban ang P200,000 sa Barangay Lanit, Jaro, Iloilo City
Ang suspek ang ginhinago sa pangalan nga Alyas Jay-jay, 40-anyos, pamilyado, kag ginabulubanta masobra sa isa pa lang ka bulan nga nagaubra sa motor parts supplier.
Sa interview sang Bombo Radyo kay Police Captain Mavin Laraño, hepe sang Iloilo City Police Station 3, iya ginpahayag nga matapos sini nakuha ang kwarta, nagsakay ini sa iya motorsiklo kag nag-agi sa bypass road padulong kag sang nag-abot sa Green Garden Memorial Park, nagsakay ini sa taxi padulong sa direksyon sang Mandurriao
Ginatan-aw man sang kapulisan nga posible planado ang pagpang-holdup sang suspek bangud ini ang una nga bes nga nag-agi ang mga ini sa Lanit sa baylo sang coastal road halin sa norte nga bahin sang Iloilo.
Base man sa imbestigasyon, posible nga indi ini taga-Balantang, Jaro, Iloilo City ang suspek bangud indi ini pamilyar sa mga barangay officials.
Sa subong, padayon nga ‘at large’ ang suspek kag ginapangita man sang kapulisan ang pamilya sini agud makahatag sang dugang nga impormasyon.
Nagaserbe bilang driver ang suspek, samtang ang biktima naman amo ang collector.
Halin sila sa Quinto Distrito kahapon, apang sang nag-abot na sa Lanit, Jaro, nagdeklarar sang hold-up ang suspek kag nagpahayag nga kinahanglanon gid sini ang kwarta.
By: Bombo Phauline Pillora
