𝗝𝗔𝗥𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Naga-amat-amat na klaro ang kamatayon sang isa ka LGBTQ+ member nga nasapwan-patay sa iya apartment sa Zone 1, Jalandoni St., Brgy. Our Lady of Lourdes, Jaro, Iloilo City.
Ang biktima amo si Victor “Vic” Lorca, Nurse V sang Center for Health Development – Western Visayas, kag tumandok sang Maasin, Iloilo.
Sa interview sang Bombo Radyo kay Police Captain Melchor Tolentino, hepe sang Jaro Police Station, iya ginpahayag nga may na-trace sila nga isa ka indibidwal nga ginapahayag nga nagbisita sa biktima sang Myerkules sang gab-i.
Suno kay Tolentino, nagpakig-istorya sila sa ginatumod nga indibidwal, sa diin, gin-ako sini nga nagpadulong siya sa apartment agud nga bisitahon ang biktima, apang nagpauli ini sang las-12:00 sang kaagahon, adlaw na sang Huwebes.
Ginpahayag man ni Tolentino nga gin-updan pa sang biktima ang bisita sini tubtob nga nakaguwa sila duha sa highway, sa diin, ginapahayag nga naghaboy pa sang basura ang biktima.
Matapos nga nadul-ong paguwa ang bisita, suno sa indibidwal, amo na to ang ulihi nga kahigayunan nga nakita niya ang biktima kag wala na sini nahibaluan kun nakabalik pa ini sa iya nga apartment.
Santo naman sa kuha sang closed circuit television ukon CCTV, may naguwa nga indibidwal halin sa apartment sang biktima sang las-6:00 sa aga, adlaw sang Huwebes, Hunyo 13, 2024.
Nakita man sa CCTV nga nagsakay pa ang indibidwal sa motorsiklo nga ginapanag-iyahan sang biktima, sa diin, suksok pa sini ang panapton nga iya man sang biktima.
Sa inisyal nga imbestigasyon sang otoridad, posible nga ang ginatumod nga indibidwal ang isa ka massage therapist.
Nagapabilin naman nga missing ang motorsiklo sang biktima kag tubtob subong wala pa makit-an sang kapulisan.
Nahibaluan nga ulihi nga nakit-an sang caretaker sang apartment ang biktima sang Myerkules sang hapon, Hunyo 12, 2024, sa diin, nagpamangkot pa ini sa iya tuhoy sa function sang ila nga tubig.
