Ginhabulan sang madamol nga abo ang mga malapit nga pamalay sa Mount Merapi volcano nga nahamtang sa Java Island sa Indonesia nga amo ang naglupok sang Marso 10.
Masobra sa 250 ka mga indibidwal ang gin-evacuate kasunod sang volcanic eruption kag subong temporaryo nga nagatinir sa split type villages control nga kaangay sang Glagaharjo kag Umbulharjo sa Yogyakarta province kag Central Java’s Klaten district.
Ang Mount Merapi ang pinakaaktibo sa masobra 300 ka mga bulkan sa Indonesia.
Nagadangat naman sa 76-100 sa 300 ka mga bulkan ang makabig nga aktibo.
Ang Mt. Merapi ang kilala man sa tawag nga “Mountain of Fire” nga naghalin sa Javanese combined words nga “Meru,” nga nagakahulugan sang “mountain,” kag “api,” nga ang meaning “fire.”
Wala naman sang narekord nga napatay ukon nasamaran sa amo nga paglupok sang bulkan.
Suno kay Bombo International Correspondent Ginavella Limpin Cumla,– direkta sa Indonesia, iya ginpahayag nga bangud sa paglupok sang bulkan, ila nahibaluan kun ano ka kadasig ang pagresponde sang Indonesian government sa amo nga kalamidad.
May yara na na suno sa iya sang plano ang gobyerno kag mahapos man nga mapasunod ang mga residente.
Suno kay Cumla, indi man mapahalin ang mga residente sa lugar nga malapit sa bulkan bangud tuman ini ka tahom kag makabig nga tourist attraction.
Apang suno kay Cumla, kun may yara sang alert status ang bulkan, pila man sa mga residente ang nagadesisyon nga una na nga mag-evacuate bangud sa kahangawa nga maglala ukon mangin mabaskog ang volcanic eruption.
Kun maobserba sang mga otoridad nga posible magdako ang paglupok sang bulkan, ginasirado na ang access sa lugar sa kalayuon nga 8km-12 km.
Sa nauna na nga mga volcanic eruptions, nagalab-ot sa kapin 12 km ang pag-ilig sang lava halin sa bulkan.
May yara man suno kay Cumla sang ginapatigayon nga volcanic observatory malapit sa bulkan agud nga ma-obserbahan ang movement ukon kondisyon sini sa tagsa ka adlaw.
Ang ulihi nga pinakadako nga paglupok sang Mt. Merapi ang natabo sang 2010 nga nagpatay sang 347 ka mga indibidwal kag nagtuga sang evacuation sa 20,000 ka mga residente sang lugar.
