Ginklaro sang Department of Health (DOH) nga mild variant lamang sang monkeypox cases ang na-detect subong sa Pilipinas nga amo ang tayuyon nga gina-monitor sang awtoridad.
Suno kay Health Secretary Ted Herbosa, ini nga mpox Clade II ang tuman ka tahaw kag sarang maglaton paagi sa skin-to-skin contact.
Gin-athag man sang ahensya nga pila sa fatalities nga ila na-rekord ang wala napatay bangud sa mpox kundi sa kumplikasyon dala sang advanced human immunodeficiency virus ukon HIV.
Sa pihak sini, todo-panagang ang pungsod suno sa ahensya agud nga indi makasulod ang Clade 1b variant nga amo ang mas madasig maglaton kag mas delikado.
Lakip sa latest cases amo ang sa Davao Region, amo man sa Iloilo City kag Iloilo Province sa Western Visayas.
Ang sintomas nga ginabantayan para sa mga malatnan sang mpox amo ang rashes ukon ang mucosal lesions nga mahimo maglawig sang duha tubtub sa apat ka semana. Ang rashes nga ini ang mahimo man dunganan sang hilanat, sakit sang ulo, pagpalanakit sang lawas, pagluya, kag swollen lymph nodes.
Pagpalayo sa iban nga mga tawo, husto nga pagtatap, kag pagpahuway ang kinahanglan agud nga maka-recover ang pasyente nga may amo sini nga kondisyon.
