𝗜𝗟𝗢𝗜𝗟𝗢 𝗖𝗜𝗧𝗬 – Wala sang katupong nga kalipay ang nabatyagan sang bag-o ginkoronahan nga Mr. and Ms. West Visayas State University (WVSU) 2025.
Ini amo sanday Hyle David Daduya kag Michelle Anne Juanitas, lunsay naghalin sa College of Nursing.
Sa interview sang Bombo Radyo kay Michelle Anne, 3rd year Bachelor of Science in Nursing student, kag tumandok sang Barbaza, Antique, iya ginpahayag nga bata pa lang siya mahiligon na siya magpasakop sa mga pageant.
Ang pinakaulihi sini nga pageant nga ginpasakupan antes ang Ms. WVSU 2025 amo ang Lin-ay Kang Antique 2023 sa diin nakuha man sini ang korona.
Suno kay Michelle Anne, madugay sini nga ginprerahan ang pagpasakop sa Ms. WVSU, gani amo na lang kalangkag nga nagbunga ang ila pagtinguha nga makuha ang titulo.
Magluwas sa extra-curricular activities, ginatutukan sini ang iya pagtuon sa diin handom sini nga mangin isa ka Registered Nurse.
Suno naman kay Hyle David, 4th year Bachelor of Science in Nursing student, residente sang Tagbak, Jaro, Iloilo City, ginakabig sini nga isa sa pinakamasadya nga hitabo sa iya kabuhi ang pagdaog bilang Mr. WVSU 2025.
Gin-ako man sini nga tuman ang pressure sa iya bahin nga makuha ang korona sa diin sila ikatatlo na sila nga sunod-sunod nga batch sa ila kolehiyo nga nagdaog sa pageant.
Ginpahayag sini nga nangin inspirasyon man sini sa pagpasakop sa pageant ang iya magulang nga si Hans Gabriel Daduya nga ginkoronahan bilang Mr. Central Philippine University (CPU) 2024.
Sa interview naman sang Bombo Radyo kay Hans Gabriel, iya ginpahayag nga siya ang pinakauna nga myembro sang ila pamilya nga nakaangkon sang korona matapos nagdaog bilang Mr. CPU 2024.
Sang nagligad nga tuig, nakuha man sang nila ni Stella Maris Lapay nga halin man sa College of Engineering ang korona sa Mr. and Ms. CPU.
Suno kay Hans Gabriel, wala ini sang anuman nga experience sa pageant gani amo na lang ang iya kalipay matapos nakuha ang korona sa diin ginahalad niya ini sa iya pamilya kag mga abyan nga nagsuporta gid sa iya.
Ginpahayag sini nga ginapabugal man sini ang iya manghod nga si Hyle David nga nagsunod man sa iya tapak sa pageantry kag nakuha ang korona sa Mr. WVSU 2025.
Sa subong, si Hans Gabriel ang isa na ka software engineer kag web developer.
