ILOILO CITY – Ginatahod ni Executive Asst. for Barangay Affairs Mr. Jose Fernando “Boyet” Rico ang pagpa-blotter sang tiayon ni Task Force on Moral and Values Formation Head Mr. Nestor Canong.
Ini ang may kaangtanan sa ginapatuman nga Oplan Hawan sa syudad sang Iloilo sa diin nagalaksam na sa dalan ang porsyon sang balay ni Canong sa Brgy. Raiwaly, La Paz, Iloilo City.
Sa interview sang Bombo Radyo kay Rico, iya ginpahayag nga ulihi na lang niya nahibalu-an nga ginpa-blotter siya matapos ang pag-ekis sang Oplan Hawan team sa balay ni Canong.
Suno kay Rico, ginatahod niya ang ginhimu ni Dr. Lorna Canong bangud nga may yara man sang kinamatarong ang tagreklamo nga magpa-blotter.
Ginpahayag ni Rico nga ang ginhimu sang Oplan Hawan team ang nasanto sa mandu ni Iloilo City Mayor Jerry Treñas nga pangkuhaon ang tanan nga nagasablag sa dalan.
Sa pagkamatuod suno sa natungdan, porsyon lamang sang balay ni Canong ang nagalaksam sa dalan kag ang Oplan Hawan ang patas nga ginapatuman sa bug-os nga syudad.
Antes pa man ginbutangan sang ekis nga pula ang balay ni Canong, ginpahayag ni Rico nga ila anay nga gintakos ang right of way.
Sa pihak sang natabo, ginpanindugan ni Rico nga ginahimu lamang niya kun ano ang iya trabaho.
Wala pa makahatag sang pahayag ang pamilya Canong tuhoy diri.
