Nadugangan pa ang mga pangalan sa Estados Unidos sang Amerika nga interesado man sa pagbakal sa short video application nga TikTok agud nga maluwas ini sa dalayon nga shutdown sa amo nga pungsod.
Kun suporta ni US President Donald Trump ang pagahambalan, duha ka mga tech giants ang nakakuha sang pabor halin sa iya.
Ang una amo si Elon Musk nga amo ang chief executive officer sang Tesla kag SpaceX kag tag-iya man sang social media app nga X ukon ginatawag anay nga Twitter. Isa si Musk sa nagapanguna nga financial backers ni Trump sa kampanya kag nakaposisyon nga makahatag sang daku nga impluwensya sa administrasyon sang Republican leader.
Ang isa pa ka bilyonaryo nga ginapaboran ni Trump amo ang iya long-time supporter nga si Larry Ellison nga amo ang co-founder sang Oracle nga isa ka software company nga amo ginapuy-an sang kadam-an sang US servers sang TikTok.
Nagpabutyag naman sang iya interes si Jimmy Donaldson ukon mas kilala nga si MrBeast, isa ka YouTube star nga amo ang highest-earning creator sa internet.
Nag-upod ang 26-anyos nga internet star sa isa pa ka tech entrepreneur nga si Jesse Tinsley para makapatigayon sang all-cash offer para maangkon ang American unit sang TikTok.
Sang nagligad nga weekend, matandaan nga indi na magamit ang TikTok sa US bangud sa plaso nga ginhatag sang US Congress nga dapat ibaligya ini sang Chinese parent company nga ByteDance sa non-Chinese buyer.
Nagbalik ang serbisyo sini sa masobra sa 170-million Americans kadungan sang promisa ni Trump nga salbaron niya ang aplikasyon sa kondisyon nga ihatag ang 50% ownership sa US investors.
